Mon lean Fredrik Prost, mon lean duojár ja dagan juohkelágan garradujiid. Mon boađán Viikusjávrris mii lea unna giláš Vazáš čearus davimus Ruoŧas. Mon orun Gironis goste mus lea mu duodjevearstá maiddái.
Mánnán mon oidnen min čáppa dujiid ja miella ieš álgit duddjot šattai. Boarrásit duojáriin mon ohppen vuođu ja álgen 15-jahkásažžan ruovttus duddjot. Moadde jagi maŋŋil mon vázzen golbma jagi Sámiid oahpahusguovddažis Johkamohkis ja bessen oahppat muhtin dain Sámi čeahpimus duojáriin. 
Dál mon beasan beaivválaččat bargat dujiin ealáhussan. Mu duojis mon geahččalan geavahit dušše luondduávdnasiid ja vuođđu lea min rikkes Sámi árbevierru.
Árbevirolaš duojis lea juohke oassi dehálaš ja dan dihte mon dagan ieš visot ávdnasiid dego niibederiid, sastti ja riehti. Luondu buktá ávdnasiid ja inspirašuvnna.
Vuollegašvuođain mon doalvvun viidáseappot min máddariid duodjeárbbi boahtte bulvii.
